ठूलोसानो जात एसरी बनेको रहेछ !!

ठूलोसानो जात एसरी बनेको रहेछ !!

जुन ब्राह्मणले वनमा निवास गर्दै प्राकृतिक रूपमा उम्रेको अन्न, फलको भोजन गर्दै सधैं श्रद्धापूर्वक ब्रह्मतत्वको उपासना गर्छ, एस्तो ब्राह्मणलाई ऋषि भनिन्छ | ११/१४

एक पटकको भोजनले सन्तुष्ट हुने, सधैं षड्कर्म गर्ने(दान दिने दान लिने, यज्ञ गर्ने यज्ञ गराउने र वेद पढ्ने वेद पढाउने) ऋतुकाल प्राप्त गरेकी आफ्नी पत्नीसंग शारीरिक सम्बन्ध बनाउने ब्राह्मण द्विज हुन्छ | ११/१५

लौकिक कर्ममा लागेको, पशु पालन गर्ने र ब्यापार-कृषि कर्म गरेर जीवन यापन गर्ने ब्राह्मण वैश्य हुन्छ | ११/१६

अर्काको काम विगार्ने, अभिमान गर्ने, आफ्नो मात्र स्वार्थ हेर्ने, अर्कासंग छलकपट र शत्रुता गर्ने क्रूर ब्राह्मण मार्जार अर्थात् विरालोझैं हुन्छ | ११/१७
पधेरो, कुवा, तलाव, उपवन, बगैचा र पाटीपौवाहरू नसोची नष्ट गर्ने ब्राह्मण नै म्लेच्छ अर्थात् शूद्र हुन्छ | ११/१८

देवधन, गुरुधन, अर्काकी पत्नीसंग जवरजस्ती दुराचार गर्ने जोसंग पनि बसेर जस्तोसुकै भोजन गर्ने ब्राह्मण चण्डाल हुन्छ | ११/१९

एसरी संसारका जातिहरूको निर्माण भएको हो | आरम्भमा सबै ब्राह्मण थिए | उनीहरूले जस्तो कर्म गरे कर्मका आधारमा जात निर्मित हुँदै गयो | आज पनि नीच कर्म गर्ने व्यक्तिहरू छन् | ब्राह्मण परिवारमा जन्मेर केही हुन्न | कर्मले उसको जात निर्धारित हुन्छ |

श्रीमद्भगवत-गीतामा भने हरेक व्यक्ति जन्मदा शूद्र हुन्छ भनिएको छ तर कर्मलाई नै आधार मानेर जातको विभाजन भएको छ | चाणक्यले भने अमृत-सन्तानका रूपमा मान्छेले जस्तो कर्म गर्छ उस्तै जात हुन्छ भन्ने अभिमत व्यक्त गरेका छन् | यहाँ सीपका आधारमा होइन आचरणका आधारमा जातपातको ब्याख्या भएको छ |

एसरी जातजातिको विषयलाई बुझ्ने हो भने पूज्य र निन्दनीय कर्म हो, जन्म होइन | जन्मका आधारमा कुनै पनि अछूत हुँदैन | अपराध कर्म गर्नेहरू नै म्लेच्छ अर्थात्मशूद्र हुन्छन् | महापण्डित चाणक्यले २३ सय वर्ष पहिले नै यो तत्थ्य चाणक्यनीतिमा स्पष्ट गरेका थिए |

कपिराइट : गोविन्दशरण